مول النية
غير خبيز ربي في طبقو
يلا ما نفع ،مايضر
مايدي مايجيبب
ديما مهورها
ونيتو مسلكاه،بفضل من الله
قالوا زمان :
حاجتو عند الله مقضية
البركة محاوطاه
والذكروالحمد مايخطاه
الصدق عندو سند و وتاق
خيرو بالطبع ديما سباق
تتامل حروفو
تجبرو قانع متبت وعادي
وديمامبشور ،من عند الله منصور
بالالطاف الخفية والعناية الربانية.
سبحان رب الاكوان…..
خلق وفرق…..
،سبحانك ياالجليل رب البرية
اللي عطتيه خير ومزية
وكرمتيه بهد العطية
اماقليل الأصل والنية،
ماريحاتو نفسو،
ولاتبت راسو على خدية
يبات ويضل يبحث
على شي “فكتيم” جديد السمية
يدبر عليه فشي قضية
يحفرلو بالمكر شوية بشوية
من تحت لتحت حتى يعيا
وتدور عليه الدايرة بالخطية
وتزيدو ، رزية فوق رزية
مايعرف راسو
لاباش تصاب او شنو سبابو في هد البلية
والحيرة ناقوس رقاص
خداتو وخدة،. داية فيه، وبه جاية،
يداري غبنتو الشاكية وفي صمت باكية
يخفي الدمعة،
يبلع الغصة،
يسد البكية
ونارو الزغيبي …حامية
بالدواخل مشعللة كادية
والغبينة بلهيب الشمتةكاويه
كيتو المتعوس… كية
يدور غي وحدو يتراقص
شكون يفكو من هد الجرية
وشكون حتى داه لها !
هو ..هو الراس الكحل .
يتقدم لك بالضكة ،
غرزتو مدفونة ،والمكايد عندو مخفية
هو مول المقالب والقوالب
هو اللي ،ماقادتو حتى ارض
يتحير في جذبة شيطان
يتلوى في رقصة حية.
حسبنا الله ونعم الوكيل من قليل الاصل والنية
حسبنا الله ونعم الوكيل في كل غدار مكار
تعطيه بالشهد لفمو ……….
يعطيك للعين… بالعود ..و…..العمية
سولوني انا على قليل الأصل و النية ومادار في…..
أستغفر الله العلي العظيم
ماتثمر فيه عطية
ولاتصح فيه زكية
يتبسم لك زعم
وبسمتو طافية خالية
كحلةزحلة شمسهامجلية
وشفتو قرطاس
تطيح الزرزور من فوق السور
ماهناه وسواس نفسو المبلية
تضل تبخ السم وعند بالو داير مزية،
وهوخاسر راسو وناسو
ومضيع دنيتو واخرتو
بالغدر والمكر والطمع والخطيف
سيرتو سابقاه وعليه داوية.
الله ينجينا وينجيك
من شر الخلق وطلسم البلية.
مول النية وقليل النية
عمرهم ما يتلاقاو
حكايتهم حكاية ورواية
،مايعلم بنواتها
غير رب الكون
علام السر المكنون
بين الكاف والنون .
وسبحان الله في شأن عبادو
كلها و شنو عطاه
وكلها باش ليه جاية
قالوا زمان مول النية يربح
حاجتو مقضية،وافعالو مرضية
وملايكتو حرصاه ،بقدرة ربانية
النية صافية، والمحبة الراقية
سعداتو وفرحاتو وهناه،هنا ولهيه،
محصن ببركة نورانية،
وبحفظ من الله العزيز
برحمتو متوج مبهج
هي الفضل وراس المال
و هي من الكريم الوهاب زين العطية…..
الشاعرة آمال السقاط الضخامة/ المغرب
