بغيت نكون شمس الضحى
ونحن عليا
في عز الصيف و نظلل
بسحابة خارجة من لهيه
في ربيع كلو زهر ونوار
بغيت نكون ضو في عز الليل
تبان لي طرقان مفصلة
وبغيت نكون تاج راسي
بلا مرجان
وبغيت ..وبغيت …وبغيت
لكن فين انا مني
فين غبر ظل ظلي
بين أغصان التيه
لملون بدم الغزلان
باقية شي غزلان ؟
يمكن حلمة في نعاسي
تكابر وتغني لي ألحان
ياك ملي نكون أنا
تفرح كل لغصان
ترجع حواء وحدها لجنة العدنان
واش بصح كاين جنة مور حياة بلا طعم
الفن والهربة في جنوني
المهم كاين شي حاجة مني
عايشة فيا تخليني
غطاس في بحور عامرة حيتان
عامرة كان وكان
نصيد بصنارة السؤال
نزول الضباب إلى كان
ونسرح فيا
نكتشف وجدان
نقطع ويدان
وبيني وبين الحب
تيار …تيقار
على شفار عيني نبني قصور
نحط ليك تمثال
نعنق طيفك
نغزل من حرفك
سالف ونطلع به
الفوق في منارة المرسى
وانت ربان
هذا ما جاب لي عقلي
العامر بسكاتي
وصوت السكات قوي
يغلب ريح …يغلب طوفان
خليني غير هنا
نكتبك ركاكة
نكتبك بلا نقط بلا حس
خليني غير هنا نمارس جنوني
نفك شفرات وجودي
نغني ليك بصوتي
شحال خافت صوتي
شحال نشاز
ليلتك فرح
يا الساكن جروحي
يا غريب حروفي
خليني غير هنا
نسكت فيا اللي باقي
نحرث خدود الزمان
ونرسم وجهك على المساكن حروفي
الشاعرة لحمر كلثوم/ المغرب
