عالم صوفي
حط الهمزة فوق الشده
تعطيك المعنى مدوبل فالكلمه
ؤ حط السؤال فوق السطر
تفهم عالم صوفي ؤ تعبر
ؤ بنادمنا الى حل فمو تحسبو
واكل الشعير
راه المعنى بلا فهامه
من قلة ترابي ولو تلبس زارا
و گوتشي من الفترينه
راه القيمه بالعقل تتوزن
ماشي فالعفطه ؤ الخنز يبان فالهضرة
العاقل بعقلو معقل من اول حرف
ؤ التايه التافه من طباعو تبان وساخو
ؤ الى بغيتي تفهم التاريخ فجبال الريف عف
ؤ البلاد فهوا الخريف
بانت الورقه المعلقه فالرف
إلى زندتي النار فالكوة تبان شرارو
ؤ كيّل الميزان بدراهم يرفعوك لسماء
ؤ لي عاش بالحرف ؤ الخلق الزين
يرخاص ف سوق القعده
ؤلا تساوم روحك على قبل لذّه
ؤ لا تشكي من المخبي لك غدا
ؤ لا ترجع للبارح باش تكمل الرضاعه
تأملت فعالم صوفي
ؤ لونت الشمعه بضفار المحبه
تا بانت العلامه فضهري شاهده على اللحضه
ؤ لي هز سيف حر مع الاحرار مقامو
واخا لازم يطعنو الخاين فظهرو
ولو يزوق الكحل بالغوز طمع ياكل منو بين ضلوعو
ؤ سولو هاري لما تاق ؤ باع الشرف بالحب
خبارو شاعت ؤ زاد نزل مقامو
لا سميه
لا تقه
لا محبه
ولا الرفيق لي حلف بالوعد والموت
ؤ قسم بيمانو يبقى فالظهر بقا فكلامو
الحياة اتعلمك ديما لي مخبي فالضلمه
ؤ كلما شعلتي فتيلة المعنى بفهامو
بان لك علاش الرمش سابق العين
ؤ علاش القلب مخبي بين الضلوع
ؤ لي خطاتو الحكمه ضاع فغمه
نضوجية الرجال تبان فجلسة الشرفه
ؤ هيبة عالي المقام تبان ف الأحكام
و لي ماعرف كيفاش يسول و ياخد الجواب
ايموت فعماه غارق فظلام جهلو
ؤ صوفي بالصفا مخبيه نيابها فالفهامه
هذا جهدي عليك باش ترقى ؤ تخرج من
عقلية البهيمه.
الزجال عماد والحاج/ المغرب
