ظهرت شمس ورا شمس
ودكت ليل ورا ليل
جاء الربيع …بلا وردو ..
والشتا بارد ..بلا قطراتو ..
و الخريف …الشجر باقي مغطي بوريقاتو ..
و الصيف …حرق قلبي …بدقاتو ..
حطيت عيني مور داك السور …
و فات عليا طير اليل ..
ضرب لي وجهي بجنحاتو …
و بقيت فايقة …كذبت الوقت و لحظاتو ..
كيف نبدل لمكان …وانت باقي ما شفتو
انت باقي عايش فيا ..
باقي نسمع صوتك ..
من بعيد …و عارفاك بعيد…
ونخلق منك شبيهك ..
يسرح فيا ..و نحسب خطواتو ..
عجني غيابك…خبز بلا خميرة بلا ملح ..
شكلني سكاتك…كيف بغا …
كرة في خطوط الوهم …
خرافة …قديمة ..
غشيمة …سرطت الهم …
لقمة مشوكة
وقفت في حلقي
جيفت الفرحة في عيني
مسحت الحب من لونو
ما شكيت في اللي هزيت
ما نعلت باش حسيت
كنت حايرة في غمامة
مرة تغطي خوفي
مرة تعلمني نخوي
مرة نمسحها باللي كان
بيني وبين الأيام
ملي كنت حازمة حلمي
ملي كانت الكلمة عهد
و كانت القعدة ود…
خليت راسي رحبة دراس
…
حب وتبن …
بدلت به جمرْ…..
بغا يحرق نادَر لعمر …
طفيتو بشوية …
عنبر …
غطيتو بيا …
و لفيت اللي باقي ..
بلون بيض …
فيه نقطة ..
فيه كون..
و فيه وقفت …
باش نبدا …
ندوي …نريَّش ..
و من بعيد…بان لي شوية …ضو…
نقيس عليه …ونمشي …خطوة ..خطوة …
حتى يبان لي ساسي …..
الشاعرو لحمر كلثوم/ المغرب
