بغيت نكتب
نتعلم نكتب
نخلي الضو في راسي
نقنع عقلي بحرف مني
ماسخ
بغيت نخلي تاريخ
يمشي على التاريخ
نتفقه فيا وبيا
نمحي رجلين الظلام
نخلي الريح
يدخل مني
نجبد مني
نخربق بيدي
نكتب بلا ما نخلي
الوقت يرقص على ظلام
نضويه في
كل ايامي
نحول مجراه
واخا الواد عاقل على مجراه
الزمان نعمر به وقت مني
نخليه يشبهني
فاش يشبهني ؟
يمكن في لحظات مجنونة
بخمرة فرحة في القلب مسجونه
تغيب الضلات
وتسرح سربة عقلي
بمكاحل
عامرة بفتاتي
اش غن خلي
والتاريخ ليه ذاكرة ووذن
ينساني
كل اللي كان فيا ساكن
اللي عليه بنيت
عرش كامل
لساس من غبينة
خليتها تعيش عليا بيا
درت رحل وعلقت عليه
ما نعاني
ونسيت نشعل ضو الحس
الذات
فيا
نكتب بلا مداد
نشبع ذاتي بسكات داوي
بصمت هايج
بحقيقة فيها ألف محال
نرسم نهاية كلها
أغنية تغني ليا
نكتبها
في قاع قاع عقلي
المعمر بضو
داخل من كل كلمة ديالي
واوف ننساها
وفي التاريخ ننساها
في العدم نرميها
ونمشي انا
وعقلي
ونكتب
حتى نمشي لهيه
بلا ما نعقل
والتاريخ اللي كتبتو
يشهد على هبالي
الشاعرة لحمر كلثوم/ المغرب
