إيه اليام
كيف سميتك
نخليك هنا
تخيلتك فوق عقلي
حاضية معايا
لقيتك سحابة
تابعة برد حياتي
تقت فيك
كنت مزال شابة
و عقلي فرحان معايا
اليوم غبرتي
نلحق بيك
فين انت نازلة بلا ظلي
بلا خيالي
نركب ليك على جناح
حلمة
نكتب ليك
على جناح حمامة
نطلع ليك لسماك
بعيدة
نبني بيني وبينك
قنطرة من الحيرة
نقطع ليك
على ما بقى مني،
خليت ليا
شوية منك
من ضحكة كانت تابعة هوايا
خليت منك شوية زين منك
كحل عينيا
بغيت نشوفك كيف
انت
كيف انا ولا جددتي
الوقت هو انت
عمرك تشرفي
خط داز عليا
كنت معاك في كل مرة
نحكي ليك
سر لغبينة
و ننساه
ظنيتك تسمعي
انت كنت عارفة اش،غيوقع ليا
يمكن نطوف معاك
علىكل مريض في فراش
بارد قبرو حفروه
ما بقا عندو شغل
بحالي
وقفت على رجليا
نكابر نكابر
وندوي مع ذكراك
ظنيتك عاقلة عليا
ايامي انت كنت ليا
انا ظنيتك ملك يديا
و بنيت عليك
كل ما عندي من عيب نفسي
نحكي ليك وننساه عليا
بينوكيو انت ايامي
درت منك سرج
من ذهب حبي ليك
طرزتو
مشيتي عليا
وسرجي ؟
فين حطيتيه
كنت غالطة عطيتك
ما عز عليا
ما حسيت به ليا
اليام
سيري قدامي
شفتك غير كنت ضاحكة عليا
سيري تبعي ريح جديد
وانا اللي عشتو علمني
والحقيقة انت وقت
محسوب فايت
بلا قلب بلا روح
انت واقع وانا كان هارب ليا
الشاعرة لحمر كلثوم/ المغرب
